سواليف حصيده :: خلويات ،،،، وفضائيات ..
جلطتني عنجد قنوات التلفزيون ....
مش طبيعي شو صاير يركبني سبعين عفريت لما أتفرج على التلفزيون ....
مش وأنا بتفرج على قناة محددة .... لأ .. بالتحديد وانا بقلب بين المحطات ...
وأكثر اشي جالطني وعاملي وسواس قهري ... كيف بستغلو الموبايل عشان يشلحو الناس .....
مش يشلحوهم أواعيهم ... لأ .. لانهم شالحين لحالهم ... ..قصدي يشلحوهم مصاريهم ...
صار نفسي أشوف قناه ما فيها خط أسفل الشاشه وفيه حكي ما أسقع منه غير اللي سمح بعرضه ..
- محمد من الامارات حاب يتعرف على بنت شعرها أحمر ....
- عاشق ديانا حداد يهديكي قلبه يا سماهر ...
- أموت فيكي يا دينا يا صاحبة الوسط الهزاز ... زي الموبايل الرجاج ...
- معذبة في الغربة تريد التعرف على من ينتشلها من العذاب
طيب شو بستفيدو هذول الناس غير انو بنضحك عليهم ...
ابعث مسج يعني باربعين او ستين قرش وبنعرضلك اياها على الشاشه ....
هسا معذبة في الغربة لما بعثت هاي المسج متوقعه انو حدا فعلا ينتشلها من العذاب حتى لو قرد ان شاء الله ينتشلها ولا بس سقاعة وجه ...
وشغله ثانيه أحلى ... شفتها بس امبارح ....
قال ما هو الشيئ اللذي في الفضاء من أربعة أحرف اذا أضفت له حرف أصبح اسم علم مؤنث ...
احزر واربح عشرين ألف دولار ..... غريب ليش الناس طفرانه ؟؟؟؟
يعني من وسائل الثراء السريع .... أسرع من الاسهم ...
احزر الحزيره اسبوع زمان ... وابني لك شقتين بالميه واربعين ألف دولار وأجرهم .. وبلا هالشغل ..
وعد اتصالات ... وعد دقايق ...
ليش بتفكر انك بس تتصل مباشرة بتطلع لك الاموره ام الشفايف السيليكون ونص صدرها مبين وبتقولك يالله احزر .. مبرووووووك .... ربحت عشرين ألف ؟؟؟!!!!
لأ يا حبايبي ... بطلع لك مقسم بحكي باللهجة البطيئة ....
- لقد وصلت الى قناة السعادين الزرق ....
وقد اقتربت جدا من الوصول الى حل السؤال ...
اضغط رقم واحد لمسابقة أزنخ سؤال ...
رقم اثنان لمسابقة افكح واربح ...
رقم ثلاثه لسؤال الحلقة ...
رقم ........
ورقم عشره عشان تطق وتموت وانت بتستنى ....
وبلطعوك نص ساعه والدقيقة بستين قرش .. وانت ريالتك ساحه على العشرين ألف
وحاول مرة أخرى ( بفتح الهمزة ... )
ويا عيني على التصويت .....
ابعث مسج وصوت هسا ...
سوبر حمار ....
عهر أكاديمي ...
مين جاي على بالك تطلع الحقه الجاي .... النوميني يعني ( ينعن عمري )
الموضوع بايدك .... اللي بتصوتله بنطيره ... انت بس صوت وانا اخوك ....
ابعث مسج ... وصوت ....
وصوت لاغنيتك المفضله ...
وألبومك المفضل ...
ومطربك المفضل ...
ومذيعك المفضل ...
ومذيعتك المفضله ...
وأحلى فستان ... وأحلى وجه ... وأحلى ...... خلي الواحد ساكت ...
بيجي عندي على النايلسات حوالي 350 قناة تلفزيونية ....
بدون مبالغة 250 منهم ... عايشه ومموله حالها على هبلنا ....
ليش بنسمح لهم يستغبونا ... ويستهبلونا .... مش عارف ...
__________________
استغفر الله والحمد لله ولا اله الا الله والله اكبر .
__________________
|
النمط الخطي
