على رغم الأقاويل ليس للأنتخابات تأجيل ..شعر شعبي
Dec 3, 2004
شعر شعبي : مؤيد خليل خزعل- النجف الاشرف
بســم اللـه الرحمن الرحيم

غصبا عله ازلام الهبل واللات بشهر كانون تجري الأنتخابات
ابوكتها اتصير مهما اتكون الاسباب لعراق الخير بيها نفتح ابواب
وأبد ما ايهمنه تفجيرات وارهــــاب ولا مغرض يردنه عنها هيهات
ما يكدر يردنه ابهالوســـــائل وخل يترس دربنه بالقنابـــل
نخليه مثل اخيه ابنكره خاتل ذليل اويجر عللي صار حسرات
أملنه الانتخاب اودرع واقــي يشيل الراس بيهــا كل عراقــي
اوبلدنه ايصير حر اودمقراطي وعله اوسادة أمان ابليلنه انبات
نبات ولا أمن غفله يجينه ومن فوك الســطح يطفر علينه
البعثي نذل ما يعرك جبينه العراقي اشكثر منه شاف ويلات
الشفناها أبد ما راح تنعاد ابفضل الانتخاب انصون بغداد
اوتتشابك إدينه عرب وكراد ونرفع للنصر والعزه رايــات
لاح النصر ألنه ابشهر كانون غصبن عله اخشوم اللي يرفضون
نيتهم إذا كدروا يأجلون هذا الانتخاب .... اتصير كــرات
يكرون اوعلينه تكثر آلام غبـاء اوعايشين ابوهم واحــلام
يريدون الزعامه وحكم صدام اويدرون آزلمتهم من وكت مات
مو هاليوم مات ابتسعه نيسان وأصبح بالزباله وبخبر كان
فكوا اعيونكم حكموا الوجدان وبوجدانكم ســيئه النيـــات
نيتكـم خبيثه اوندري بيــكم ابن العاص خل يرجع اليكم
إذا عن سوئته كشــف أبيكم ما تنفع اويانه كشـــــف سوءات
وراكم بالسـهول اوبالروابي نفكس عين كل قاتل وهــــابي
وآحنه اويه الكبيسي والجنابي مو بس ثار النه هوايه ثارات
أول ثار جان ابقتل سـبعه من شيعة علي العدكم امودعه
الفلوجه اوأهلها خل تسمعه لهذا الصوت .. وكل حاقد اوشمات
ابمثلث موتكم عدنه ضحايـه كل اصبع نريد ابداله مايــــه
صار الغــدر عدكم مشتهايه لو عدكم هوايه امن الهوايات ؟!!!
اوضحايا باللطيفيه يروحون ابدم بارد ولا من ذنب يجنون
غايتهم لبو اليمه يزورون ليش اصبحوا مذبح للحثالات
يا أرباب التخلف والبداوه اشعدكم ويه شيعتنه عـداوه
غدركم غدر ثعلب وابن آوه يكشر انيابه من يهجم عله الشـاة
سرايا امن الغضب عالبعث جنه وشهر شعبان هوه اليشــــهدنه
اشجم مره عله الطاغي حملنه لجن جنتوا إله سـد اوحمايات
احنه الأســـــد لو غـدار غاضه ابجيلات اوتفك نطلع عراضه
اسباع اوتشهدنه الأنتفاضـه لجن جيلاتكــم من حدر ضر........ ت
نفذ منه الصبر للصبر ما انطيق وكلسـا يظهر من القوم زنديق
كلنه انريد نهـــرع للصنـاديق لمراكز الانتخاب احنه جماعــات
بس الأنتخاب ايكون فاصل بين المخلص اوبين المخاتل
اوفرق بين اليكول اوبين فاعل اوخل نعرف حجم هاي الفروقات
من الباجه جي انشد اوأسأل إذا ما ننتخب كلي شنو الحل
انصحك عن بلادي شيل وارحل اودورلك وظيفــه بالامارات
( أكسباير ) الزلمه اوعقله بايد ما ينفع ولاهو جان فايـد
عرفته لمن قبل إيد زايد لا عنده شــهامه اولا كرامات
حـر الأنتخاب اوماكو تأجيل اوخل تمليها للدنيه الأقاويل
عن البلد كل اليرفض ايشـيل مو لازم بعض من الجنابات
اوعفوا للشريف ابهالعشيره عله ابلاده التشيله دوم غيره
انتم للبلد أعظـــم ذخيــره أشراف اوحموله اونعم سادات
انكشف معدن الارهابي الغدار اوجدر الصبـر بينه فار بالنار
النه اوياكـم ابكانون مشــوار اوتفصلنه معاكم الانتخابات
****************